“Vetëm shtetet diktatoriale dhe fashiste kanë vepruar kështu ndaj grevistëve”, kështu e ka vlerësuar Këshilli për Mbrojtjen e të Drejtave dhe Lirive të Njeriut (KMDLNJ), kërcënimin me ndalje të pagave nga ana e Qeverisë Kurti 2.
KMDLNJ në komunikatën për media ka reaguar ku thuhet se kërcënimet e Qeverisë Kurti 2, “për ndalje të pagës është shkelje e të drejtave të njeriut”.
Sipas KMDLNJ-së, grevat janë veprimi i fundit sindikalist sepse kjo ka ndodhur si pasojë e mungesës së vullnetit të Qeverisë që nëpërmjët dialogut të ofroj “zgjidhje sipas kërkesës së sindikatave apo, si zgjidhje kalimtare të jetë një marrëveshje e afatizuar, dy palët kundërshtuese janë barikaduar duke mos ofruar asnjë zgjidhje”.
“Nga të gjithë segmentet që kanë filluar grevën apo që do të bëjnë grevë së shpejti, arsimi është më i ndjeshmi dhe më kërcënuesi”, thuhet, në komunikatën e KMDLNJ-së.
Më tej, KMDLNJ ka thënë se Qeveria i ka shpërfillur sindikatat dhe është duke i kërcënuar se do të mbesin pa paga nëse bëjnë grevë dhe janë kërcënuar verbalisht.
“Nëse ky kërcënim nga qeveria jetësohet do të ishte shkelje e rëndë e Ligjit të Punës dhe shkelje flagrante e të drejtave të njeriut për faktin se organizimi dhe veprimi sindikalist është i rregulluar dhe lejohen me ligj”, thuhet në komunikatë.
“KMDLNJ përkrahë grevën, si e drejtë ligjore dhe e drejtë e njeriut vetëm kur mbetet mjeti i fundit për realizim të drejtave të tyre”.
Ajo iu ka bërë thirrje të dyja palëve që të ulin tensionet e të gjejnë një zgjidhje të përbashkët nëpërmjet dialogut social.