Ish-presidenti i Shqipërisë, Sali Berisha ka reaguar për marrëveshjen e arritur të shtunën e 27 gushtit mes Kosovës dhe Serbisë.
Berisha përmes një postimi në Facebook, ka thënë që ky është një lajm i rëndësishëm në drejtimin e duhur.
“Kosova dhe Serbia ranë dakord për zgjidhjen e problemit të dokumentave bazuar mbi parimin e barazisë dhe reciprocitetit të kërkuar nga qeveria e Kosovës dmth njohjen respektive të dokumentave të njëra tjetrës dhe lëvizjen e lirë të qytetarëve”, ka shkruar Berisha.
Ish-presidenti në emër të Partisë Demokratike e ka përshëndetur këtë marrëveshje duke thënë që ky është një hap i rëndësishëm në normalizimin e marrëdhënieve midis dy vendeve
“Partia Demokratike, duke vlerësuar lart kontributin e të deleguarve të veçantë per dialogun Kosovë-Serbi të BE dhe SHBA, Mirosllav Lajçak dhe Gabriel Eskobar, si dhe te Sekretarit të Përgjithshëm të Nato-s Stoltenberg përshëndet arritjen e kësaj marrëveshje”
“Një hap i rëndësishëm në normalizimin e marrëdhënieve midis dy vendeve dhe uron që mbi bazën e parimeve te barazisë dhe reciprocitetit, parime universale në marrëdhëniet midis vendeve, Kosova dhe Serbia të zgjidhin me sukses problemet e tjera të mëdha midis dy vendeve”, ka shkruar më tej.
Ndër të tjera ka shtuar që vetëm një Ballkan i vendeve sovrane dhe të barabarta do mund të jetë një rajon paqe, stabiliteti dhe integrohet i sigurtë në BE.