Të shtunën e 27 gushtit, deputeti i vetëm shqiptar në Kuvendin e Serbisë Shaip Kamberi ka reaguar pas arritjes së marrëveshjes mes Kosovës dhe Serbisë.
Përmes një postimi Kamberi ka përshëndetur marrëveshjen e arritur me ndërmjetësimin e BE-së dhe përfshirjen e drejtëpërdrejt të ShBA-së.
“Lëvizja e lirë, sidomos e qytetarëve të Republikës së Kosovës, po merr kuptim. Marrëveshjet si këto janë të mirëseardhura edhe për qytetarët e Luginës së Preshevës”, ka shtuar Shaip Kamberi.
Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, ka deklaruar se është arritur një marrëveshje në mes Kosovës dhe Serbisë, pasi kjo e fundit ka rënë dakord të shfuqizojë dokumentet hyrëse-dalëse për qytetarët e Kosovës.
“Sipas Dialogut të lehtësuar nga BE-ja, Serbia ra dakord të shfuqizojë dokumentet e hyrjes/daljes për mbajtësit e letërnjoftimeve të Kosovës dhe Kosova u pajtua që të mos i prezantojë ato për mbajtësit e letërnjoftimeve serbe”, ka shkruar Borrell.