Ministria e Punëve të Jashtme të Turqisë ka mirëpritur marrëveshjen në mes Kosovës dhe Serbisë për lirinë e lëvizjes.
Ministria në fjalë është shprehur se shpreson që dy vendet të arrijnë marrëveshje edhe për targat.
“E mirëpresim marrëveshjen e arritur ndërmjet Kosovës dhe Serbisë për dokumentet identifikuese. Shpresojmë që palët të bien dakord sa më shpejt për çështje të tjera, veçanërisht për çështjen e targave”, thuhet në komunikatën e tyre.
Ndër të tjera, MPJ-ja e Turqisë ka thënë se Turqia do të vazhdojë përpjekjet për ruajtjen e paqes dhe stabilitetit në rajon.
“Turqia, si një vend ballkanik, i kushton rëndësi të madhe ruajtjes së paqes dhe stabilitetit në Ballkan dhe mbështet zgjidhjen e problemeve përmes dialogut, si dhe iniciativat për këtë qëllim. Turqia do të vazhdojë të përpiqet për të ruajtur paqen dhe stabilitetin në rajon”, thuhet në komunikatë.
Press Release Regarding the Agreement Between Kosovo and Serbia on Border Crossings With ID Cards https://t.co/hWkgQRjUkO pic.twitter.com/kwl1BrI0mh
— Turkish MFA (@MFATurkiye) August 28, 2022
Pasditen e së shtunës, Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, ka deklaruar se është arritur një marrëveshje në mes Kosovës dhe Serbisë, pasi Serbia ka rënë dakord të shfuqizojë dokumentet për hyrje-dalje për qytetarët e Kosovës.