Qindra ndjekës të klerikut shiit Al-Sadr, u ngjitën në barrierat e çimentos që çojnë në pallatin e qeverisë së Irakut pasi të hënën njoftoi dorëheqjen e tij nga politika, duke nxitur frikën për më shumë paqëndrueshmëri mes një krize politike të paprecedentë, raporton AP.
Menjëherë pasi Muqtada al-Sadr njoftoi tërheqjen e tij “përfundimtare” nga politika, qindra ndjekës të tij nxituan drejt pallatit të qeverisë, selia e qeverisë së përkohshme. Ishte hera e parë që ndjekësit e tij tentuan të shkelin pallatin që kur mijëra prej tyre sulmuan parlamentin e Irakut për të parandaluar rivalët e al-Sadrit të formonin një qeveri.
Protestuesit përdorën litarë për të rrëzuar barrierat e çimentos që çonin në portat e pallatit.
Ushtria e Irakut u bëri thirrje protestuesve që të tërhiqen menjëherë nga Zona e Gjelbër dhe të praktikojnë vetëpërmbajtje “për të parandaluar përleshjet ose derdhjen e gjakut irakian”, thuhet në një deklaratë.
“Forcat e sigurisë pohojnë përgjegjësinë e tyre për të mbrojtur institucionet qeveritare, misionet ndërkombëtare, pronat publike dhe private”, thuhet në deklaratë.
Në një postim në Tëitter, kleriku tha se po tërhiqej nga politika dhe urdhëroi mbylljen e zyrave të partisë së tij. Nuk është hera e parë që al-Sadr njofton tërheqjen e tij nga politika, por shumë kanë frikë se kjo mund të nxisë më shumë përshkallëzim.
Deklarata e Al-Sadr të hënën ishte një reagim ndaj pensionimit të udhëheqësit shpirtëror shiit Ayatollah Kadhim al-Haeri, i cili numëron shumë nga mbështetësit e al-Sadr si ndjekës. Një ditë më parë, al-Haeri njoftoi se do të largohej si autoritet fetar dhe u bëri thirrje ndjekësve të tij që të mbështesin Ayatollah Ali Khamenei të Iranit, jo qendrën shpirtërore shiite në qytetin e shenjtë të Irakut, Najaf.
Ky veprim ishte një goditje për al-Sadr. Në deklaratën e tij ai tha se dorëheqja e al-Haerit “nuk ishte vullnet i tij”.
Al-Sadr fitoi pjesën më të madhe të vendeve në zgjedhjet e tetorit, por nuk arriti të formojë një qeveri të shumicës, duke çuar në atë që është bërë një nga krizat më të këqija politike në Irak në vitet e fundit.
Blloku i tij më vonë dha dorëheqjen nga parlamenti dhe mbështetësit e tij muajin e kaluar sulmuan ndërtesën e parlamentit në Bagdad. Al-Sadr ka kërkuar që parlamenti të shpërndahet dhe të zhvillohen zgjedhje të parakohshme.