“Mësimdhënësit do t’i vlerësojmë sipas performancës dhe ngritjes akademike”, ka paralajmëruar i pari i qeverisë së Kosovës, Albin Kurti.
Kryeministri Kurti ka reaguar për grevat që janë duke u mbajtur në sektorin e arsimit, duke thënë se “shkolla nuk bën të bojkotohet, duhet ta ketë mësuesin dhe nxënësin, për të cilin e drejtë elementare është mësimi”.
Më tej, i pari i qeverisë ka shtuar se nuk mund të kompensohet një ditë e mësimit e cila humbet, prandaj në asnjë mënyrë nuk duhet bojkotohet mësimi.
“Ligji i pagave pas një jave do të jetë në diskutim publik, koeficienti për mësimdhënësit është më i mirë se kur sindikata pati bërë grevë e në fund u patën dakorduar për një vlerë mesatare”.
“Qeveria kujdeset për arsimtarët, dhe arsimtarët për arsimin dhe fëmijët. Nga ana e qeverisë nuk ka urrejtje dhe hakmarrje, por nuk mund të paguhen punëtorët për punën që nuk e bëjnë. Prandaj, janë bërë ndryshime demokratike në shkurtin e vitit të kaluar”, ka theksuar Kurti.
Ai iu ka bërë thirrje drejtorëve të arsimit nëpër komunat e Kosovës, që “asnjëri prej tyre të mos iu bëjë trysni drejtorëve të shkollave ose arsimtarëve që të mos e mbajnë mësimin”.