Kryetari i Prishtinës, Përparim Rama, ka bërë të ditur se hapësirat e publike në Prishtinë, tani e tutje do të jenë nën vëzhgimin e kamerave.
Rama ka njoftuar se të enjten e kanë finalizuar këtë marrëveshje me Policinë e Kosovës, për instalimin sistemit të kamerave në hapësirat publike të Komunës së Prishtinës.
“Tash e sa kohë jemi në bashkëpunim të ngushtë me Policinë e Kosovës për hartimin e marrëveshjes për vendosjen e sistemit të kamerave dhe mënyrën e mirëmbajtjes së rrjetit të kamerave në hapësirat publike të Kryeqytetit, marrëveshje e cila u nënshkrua sot”, ka shkruar Rama në Facebook.
Tutje, i pari i Prishtinës u shpreh se bashkë me Policinë e Kosovës, do t’i koordinojnë aktivitetet për ta përmirësuar sigurinë publike në kryeqytet.