Zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, pas vizitës së tij në Luginën e Preshevës ka thënë se ka ardhur momenti që çështja e Luginës së Preshevës të marrë vëmendje edhe nga bashkësia ndërkombëtare.
Me anë të një postimi në llogarinë e tij në Facebook, ndonëse është shprehur i lumtur për shpërndarjen e teksteve mësimore për nxënësit e shkollave fillore në fshatrat Tërnoc të Madh dhe Raincë, Bislimi e ngriti edhe një shqetësim.
“Vizitë e rëndësishme gjatë ditës së sotme në Luginën e Preshevës. Së bashku me ministren e Ministrisë së Arsimit, Shkencës, Teknologjisë dhe Inovacionit, Arbërie Nagavci, takuam liderë politik të Preshevës dhe Bujanocit dhe shpërndamë tekstet mësimore për nxënësit e shkollave fillore, në fshatrat Tërnoc të Madh dhe Raincë”.
“Katër mijë e 10 nxënës përfituan tekstet falas për mësimin në gjuhën shqipe në të gjitha klasat fillore. Jemi të gëzuar për mbulimin e kësaj kostoje por njëkohësisht edhe të brengosur që kemi ndarë libra për kaq pak nxënës duke ditur që deri para pak viteve në Luginën e Preshevës fillonin shkollat më shumë se 13 mijë”, shkroi ai.
Ai ka potencuar se problematikat serioze si shpopullimi, garantimi i të drejtave për shqiptarët, regjistrimi i popullsisë, njohja e diplomave, mungesa e investimeve nga institucionet, tashmë duhet të trajtohen gjerësisht.
“Për ne si Qeveri është me rëndësi garantimi i simetrisë dhe barazisë në të drejta mes qytetarëve shqiptarë në Luginë dhe atyre serb në Kosovë”, shtoi ai.
Në kuadër të vizitës së tij, Bislimi është takuar edhe me deputetin e vetëm shqiptar në Kuvendin e Serbisë, Shaip Kamberi.
Kamberi, pas takimit me delegacionin e Kosovës kërkon që çështja e Luginës të zgjidhet me marrëveshje finale ndërmjet Kosovës dhe Serbisë.
“Urojmë që në këtë pjesë Qeveria e Kosovës të jetë më shumë prezente dhe kërkojmë që çështja e Luginës së Preshevës të zgjidhet në marrëveshjen finale ndërmjet Kosovës dhe Serbisë”, ka deklaruar ai.
Po ashtu, kryetari i Bujanocit, Nagip Arifi ka pritur në takim zëvendëskryeministrin e Kosovës, Bislimin dhe ministren Nagavci.