Kryeministri i Kosovës, Albin Kurti, të premten ka pritur në takim dy këshilltarët e emëruar nga Gjermania dhe Franca për dialogun Kosovë-Serbi, Jens Plettner dhe Emmanuel Beaune si dhe të dërguarin e posaçëm të Bashkimit Evropian për dialogun, Miroslav Lajçak.
Të dërguarit e BE-së janë pritur në ndërtesën e Qeverisë së Kosovës nga i pari i ekzekutivit, Kryeministri Kurti.
Lajmin për vizitën e dy këshilltarëve të emëruar nga Gjermania dhe Franca për dialogun Kosovë-Serbi dhe të dërguarit të posaçëm të Bashkimit Evropian për dialogun, Miroslav Lajçak, për RTV Dukagjinin e kishte konfirmuar zëdhënësi i BE-së, Peter Stano, i cili ka theksuar se qëllimi i kësaj vizite është “të eksplorohen opsionet për përparimin në dialog”.
Stano ka thënë se përpos takimit me kryeministrin e Kosovës, një takim i ndarë është planifikuar edhe me presidentin e Serbisë, Aleksandër Vuçiq.
“Gjatë vizitës janë të planifikuara takime të ndara me kryeministrin e Kosovës, Albin Kurti dhe presidentin e Serbisë, Aleksandër Vuçiq”, konfirmoi Stano.
Para pak ditësh, Presidenti i Serbisë, Aleksandër Vuçiq, ka pranuar një letër të përbashkët nga Presidenti i Francës, Emmanuel Macron dhe kancelari gjerman, Olaf Scholz.
Bazuar në letër bëhet e ditur se dy këshilltarëve për politikën e jashtme dhe të sigurisë, Jens Plettner dhe Emmanuel Beaune u është dhënë detyra e të ofruarit mbështetje Lajçak-ut në përpjekjet e tij në përparimin e dialogut Kosovë-Serbi.
Tashmë, Kosova dhe Serbia kanë arritur marrëveshje për lëvizjen e lirë të qytetarëve duke larguar dokumentet hyrëse-dalëse.
Ndërkaq, më 1 shtator të këtij viti, Qeveria e Kosovës ka nisur zbatimin e vendimit të saj për riregjistrimin e targave të makinave në RKS.