Ish-kryeministri i Kosovës, Avdulah Hoti, e ka kritikuar Qeverinë e Kosovës, për mungesë të transparencës sa i përket dialogut Kosovë-Serbi.
Sipas tij, në Kuvendin e Kosovës ka munguar raportimi, edhe pse siç ka thënë ekziston një rezolutë e Kuvendit e cila i kërkon kryeministrit të Kosovës të raportojë pas çdo raundi të bisedimeve.
Hoti është shprehur se takimet me kryetarët e partive nuk e zëvendësojnë raportimin në Kuvend.
“Por, paraprakisht duhet të sigurohet transparencë e plotë nga ana e Qeverisë përmes raportimit në Kuvend, e cila gjë ka munguar pavarësisht rezolutës së Kuvendit ku i kërkohet Kryeministrit të raportojë para dhe pas çdo raundi të dialogut. Nuk ka forum tjetër për raportim përveç Kuvendit. Takimet me kryetarët e partive politike opozitare nuk e zëvendësojnë raportimin në Kuvend”, ka shkruar Hoti.
Hoti i ka falënderuar partnerët ndërkombëtarë të Kosovës, të cilët sipas tij janë të interesuar për ta përmbyllur marrëveshjen për normalizim dhe njohje reciproke mes Republikës së Kosovës dhe Serbisë.
Hoti ka kërkuar të sigurohet transparencë nga Qeveria e Kosovës edhe për komunitetin akademik, shoqërinë civile dhe mediat.