Ministrja e Arsimit, Arbërie Nagavci, ka njoftuar se Ministria që ajo drejton është duke punuar për adresimin e çdo vështirësie infrastrukturore dhe politikave arsimore.
Nagavci bëri të ditur se tashmë është rregulluar problemi për mësimdhënësit që kanë probleme të rënda shëndetësore të mos kenë nevojë të paraqiten në punë.
“E kemi fokusuar bashkëbisedimin me mësimdhënësit te politikat e reja në mbështetje të tyre, në mënyrë që të tejkalojmë secilën vështirësi së bashku, sikur që është tejkaluar ajo e mësimdhënësve me probleme serioze shëndetësore dhe nuk ka më asnjë mësimdhënës që i duhet të dalë në punë, sepse i nevojitet paga për të blerë ilaçe”, ka thënë ajo.
Nagavci e ka ripërsëritur mirënjohjen e saj ndaj një pjese të mësimdhënësve të cilët kanë vendosur ta ndërpresin grevën.
“Edhe një herë përgëzoj shkollat dhe mësimdhënësit që kanë filluar mësimin dhe kërkoj nga të gjithë mësimdhënësit e Kosovës që të mirëkuptojnë situatën, tashmë kur ata dhe familjet e tyre do të përfitojnë nga Pakoja e ndihmave financiare”, ka thënë Nagavci.
E para e arsimit theksoi se në Proejktligjin për paga, i cili që nga dita e enjte ka dalë në konsultim publik, janë marrë parasysh të gjitha kërkesat e punëtorëve të sektorit të arsimit.