Gjatë kësaj të marte, kryeministri i Kosovës, Albin Kurti, ka pritur në takim lamtumirës ambasadoren e Francës në Kosovë, Marie Christine Butel.
Gjatë takimit, kryeministri Kurti ka falënderuar ambasadoren Butel për bashkëpunimin dhe angazhimin në Kosovë përgjatë tre viteve, që nga shtatori i vitit 2019 dhe ka vlerësuar kontributin e saj për projekte në fusha të ndryshme të bashkëpunimit Francë-Kosovë.
Kurti ka theksuar përkushtimin e saj për të çuar përpara agjendën e procesit të liberalizimit të vizave për qytetarët e Republikës së Kosovës.
“Te Franca shohim shtetin aleat dhe popullin mik të Republikës së Kosovës. Vlerat e saj për lirinë, demokracinë, të drejtat dhe mirëqenien e qytetarëve që i kemi mësuar nga Franca, duam t’i aplikojmë edhe në Kosovë, në vendimet tona dhe në përpilimin e programeve tona qeveritare, tha Kryeministri Kurti. Ai theksoi se ka mirëpritur përfshirjen aktive të Francës në procesin e dialogut për normalizim të plotë të marrëdhënieve ndërmjet Republikës së Kosovës dhe Serbisë, me njohjen reciproke në qendër”, njofton Zyra e Kryeministrit.
Tutje, në njoftimin e Kryeministrisë thuhet se ambasadorja Butel ka vlerësuar pjekurinë demokratike në Kosovë, që ka sjellë ndryshimin në vend.
“Duke folur për përvojën e saj në Kosovë, ambasadorja Butel potencoi avancimin e marrëdhënieve bilaterale Kosovë-Francë, duke theksuar marrëveshjet në kulturë e ekonomi. Ajo veçoi marrëveshjen për bashkëprodhimin e filmave, si dhe projektin e impiantit të ujërave të ndotura në Prishtinë, që pas shumë vështirësive tani është në binarë”.
Në përfundim të takimit, kryeministri Kurti i ka uruar ambasadores Butel suksese në angazhimet e saj të radhës.