Në vitin 2008, menjëherë pas shpalljes së pavarësisë së Kosovës, u themelua edhe Ministria e Punëve të Jashtme.
E që nga ajo kohë, pjesë e stafit të kësaj ministrie është edhe Agron Maloku. Ai ndër vite ka mbajtur edhe funksione të shumta brenda saj, e që së fundmi ka qenë edhe drejtor i departamentit të Financave dhe Shërbimeve të Përgjithshme në kuadër të MPJD-së.
Por, pos kësaj, ai ishte edhe Kryetar i Shoqatës Sindikale të Anëtarëve të Shërbimit të Jashtëm. Mirëpo, që nga kjo e hënë, nëpërmjet një vendimi, Maloku nuk do të jetë më pjesë e kësaj Ministrie dhe ai është transferuar në atë të Shëndetësisë.
Në vendimin e Ministrisë, thuhet se ky transferim është bërë për arsye të riorganizimit të MPJD-së. Mirëpo, këtë e mohon Maloku, duke thënë se kjo është hakmarrje ndaj tij, për angazhimin sindikal.
“Nuk kam qenë i informuar asnjëherë për këtë transferim. E dyta, është hakmarrje. Vlerësoj dhe mendoj se mund të jetë kjo për faktin se unë jam edhe drejtues i sindikatës të antarëve të shërbimit të jashtëm”, ka thënë Agron Maloku, ish-zyrtar i MPJD-së.
Maloku, gjatë kohës si drejtor i departamentit të Buxhetit, tregon se nuk e nënshkroi edhe një kontratë për furnizim me vetura, me arsyetimin që kjo nuk ka pasur bazë ligjore.
“Nuk e kam proceduar tutje me qëllim që të jemi konform legjislacionit për procedimit e procedurave të tilla për incinim të furnizimeve me vetura. Bëhet fjalë për 5 vetura dhe ato vetura po ashtu nuk janë me specifikacione, nuk janë në perputhje me specifikat që u nevojiten misioneve diplomatike konsulore”, ka deklaruar Maloku.
Ndërkohë, të heshtur për transferin e Malokut në Ministrinë e Shëndetësisë kanë qenë e Ministria e Jashtme e Kosovës, të cilët nuk janë përgjigjur në pyetjet e televizionit.
Agron Maloku, thotë se do ta sfidojë edhe ligjërisht këtë vendim, duke kërkuar rikthim në pozitën e tij në Ministri të Punëve të Jashtme.