Fermeri palestinez, Salman al-Nabahin, ishte duke punuar në kopshtin e tij në Gaza, kur vuri re se disa nga pemët e reja që kishte mbjellë në tokën e tij nuk i kishin rrënjët siç duhet. Kurioz për të dituar çka e shkaktoi këtë, al-Nabahin mori djalin e tij për ta ndihmuar atë të fillonte të gërmonte. Por kur ata filluan të gërmojnë sëpata e djalit të tij goditi diçka të fortë.
“Kërkova në internet… Mësuam se ishte mozaik i epokës bizantine,” tha babai i shtatë fëmijëve, i ulur pranë zbulimit të tij. “Unë e shoh atë si një thesar, më të shtrenjtë se një thesar. Nuk është personal, i përket çdo palestinezi”, u shpreh Nabahin për CNN.
Salman al-Nabahin e zbuloi reliken gjashtë muaj më parë gjersa po punonte në kopshtin e tij me ullinj në kampin e refugjatëve Bureij, rreth një kilometër nga kufiri me Izraelin.
Ministria Palestineze e Turizmit dhe gjërave Antike tha se dyshemeja përfshinte disa panele mozaiku që përshkruanin kafshë dhe tipare të tjera të jetës shoqërore gjatë epokës bizantine.
“Zbulimi arkeologjik është ende në fazat e tij të hershme dhe ne presim të dimë më shumë për sekretet dhe vlerat e qytetërimit,” tha ministria në një deklaratë.
“Ekipet kombëtare të kërkimit po punojnë në partneritet me ekspertë ndërkombëtarë dhe shkencëtarë nga Shkolla Franceze e Arkeologjisë.”
Gaza është vend mjaft i pasur me gjëra antike, këtë e tregon edhe zbulimi i fundit nga Salman al-Nabahin.
Por për shkak të mungesës së fondeve dhe profesionistëve përkatës, Gaza zakonisht është dashur të ftojë grupe ndërkombëtare për të ndihmuar në procesin e gërmimit dhe ruajtjes.
