Shefja e Grupit Parlamentar të Lëvizjes Vetëvendosje(VV), Mimoza Kusari-Lila, në seancën e së premtes në Kuvendin e Kosovës derisa po bëhet shqyrtimi i parë i projektligjit për skemat pensionale të financuara nga shteti, nuk e ka parë si zgjidhje largimin e nenit i cili parasheh që secili kandidat për pensionin kontributdhënës duhet të ketë së paku 15 vjet përvojë para 1 janarit të vitit 1999.
Sipas saj, ky nen të cilin opozita po e quan diskriminues ka qenë edhe më herët dhe ka mbetur në të gjitha dokumentet prej vitit 2004 deri në 2014 kur është votuar si ligj.
Lila ka thënë se Qeveria e ka top prioritet këtë skemë pensionale, por që duhet të mbështetet ajo që Qeveria së shpejti do ta sjellë në Kuvend, duke e përfshirë konsolidimin e kësaj skeme, planifikim të mirëfilltë dhe të përfshihet kërkesa e tanishme e grevistëve.
“Nuk është bërë unifikim i sjelljes në Kuvend komplet, prandaj duhet të ketë reformë të skemës pensionale”.
Ndërsa, Shemsedin Dreshaj nga radhët e Aleancës për Ardhmërinë e Kosovës(AAK), ka thënë se duhet të largohet 15 vjetëshi dhe të mbetet aq sa kanë punuar para luftës.
Mirsad Shkreta nga radhët e Lëvizjes Vetëvendosje nuk e ka parë si një zgjidhje heqjen e këtij neni.
“Po të ishte kjo një zgjidhje, atëherë pse nuk është larguar ky nen tash e sa vite”, ka thënë Shkreta, gjersa ka theksuar se janë prodhuar pensione me ligje të veçanta duke mos u përfshirë disa kategori dhe, njëherësh, sipas tij janë prodhuar 6 skema të cilat akoma kanë probleme.