Kryetari i Partisë Demokratike të Kosovës (PDK) Memli Krasniqi, ka kërkuar dorëheqjen e ministres së Arsimit, Arbërie Nagavci. Ai ka thënë se ajo nuk e meriton përgjigjen e tij, sepse nuk meriton të jetë ministre.
“Ministrja e Arsimit, Arbërie Nagavci, duhet të japë dorëheqje nëse ka moral, se 320 mijë nxënës janë që 29 ditë nëpër shtëpitë e tyre, dhe kjo del këtu dhe bën thirrje”.
“O nuk jeni ju të bëni thirrje po zgjidhje, thirrje bëjmë ne dhe ju përsëri nuk po dëgjoni, ne po u bëjmë thirrje dhe sindikatave, por as ata nuk po dëgjojnë”, ka thënë Krasniqi.
Sipas të parit të PDK-së, ata (Lëvizja Vetëvendosje) nuk janë duke kuptuar se tani janë në pushtet dhe jo në opozitë, tani kanë marrë obligimin të bëjnë zgjidhje e jo thirrje.
“Jeni në pushtet e keni kontrollin e plotë të pushtetit, s’ka hallkë të institucioneve që nuk e kontrolloni dhe në fund del thotë se është mirë të bëhet thirrje. Zgjidhje duhet t’u ofrohet qytetarëve, të hapen shkollat se u kanë mbetur fëmijët në shtëpi që një muaj ditë”.
Ndërkohë, Krasniqi ka thënë se nuk mund të rregullohen kushtet e mësimdhënësve me projektligjin, sepse sipas tij ai projektligj deri sa t’i përfundojë procedurat për të hyrë në fuqi mund të jetë shtatori i vitit 2023.