Presidenti i Shqipërisë, Bajram Begaj, ka marrë pjesë në konferencë me rastin e 25-vjetorit të Shkollës së Magjistraturës.
Begaj ka thënë se misioni që ka Shkolla e Magjistraturës lidhur me përgatitjen dhe formimin profesional e moral të profesionistëve të drejtësisë mban rëndësinë historike të krijimit të një sistemi të qëndrueshëm të drejtësisë.
Po ashtu, Begaj shton se ky institucion bart rëndësinë e ndërtimit të një shoqërie të mbështetur në të drejtat dhe liritë e individit dhe barazinë e tij para ligjit.
“Sepse vetëm barazia para ligjit krijon shoqëri të qëndrueshme, të drejtë dhe në harmoni sociale”, shkruan Begaj në Facebook.
Presidenti i Shqipërisë tha se “Pavarësia dhe paanshmëria në punën tuaj sot janë çelësi i pavarësisë dhe paanshmërisë së gjyqtarëve dhe prokurorëve”. Sipas tij, përpjekja madhore e integrimit evropian duhet të shërbejë si një nxitje për të përmbushur përgjegjësitë institucionale dhe për të rritur besimin e publikut tek institucionet e drejtësisë.