Partia Demokratike e Kosovës (PDK) ka vendosur që t’i votojë marrëveshjet ndërkombëtare në Kuvendin e Kosovës.
Kryetari i kësaj partie, Memli Krasniqi, e mohoi që kjo çështje të jetë diskutuar në takimin me kryeministrin Albin Kurti. Ai tha se Bedri Hamza, kandidati i PDK-së për kryeministër, ka qenë i mendimit që ato marrëveshje duhet të votohen.
Krasniqi u shpreh se me Kurtin nuk ka pasur as marrëveshje për zgjedhje dhe se ajo duhet të bëhet me partitë opozitare.
“Qëndrimi ynë politik, për të mos i votu marrëveshjet, ka qenë si reagim ndaj faktit që veprimet e Kurtit kanë sjellë sanksione ekonomike nga BE, ka qenë reaksion që s’pajtohemi me ty. E dyta ka qenë me vështirësi qeverisjen e tij përmes veprimit politik, në mënyrë që me i përshpejtu zgjedhjet e parakohshme. Zgjedhjet e parakohshme marrin rrugë javën e ardhshme. Arsyeshmëria për pozicionim politik që i sjell zgjedhjet nuk është më. S’kemi qenë komfor, në faktin që këto marrëveshje, një pjesë nuk shkojnë tutje”, ka thënë ai.
“Prej kur i kam thënë Hamzës idenë time, që ai duhet të jetë kandidati për km, dhe i ardhshëm. Një nga temat që m’i ka ngritë ka qenë marrëveshjet ndërkombëtare. Ka pasur kërkesë që në momentin e parë që nga kandidimi i tij të gjendet rruga për votimin e tyre”, ka vijuar ai.
Krasniqi ka ripësëritur se vendimi për votimin e marrëveshjeve ndërkombëtare është i pavarur nga takimi me Kurtin.