Aleanca për Ardhmërinë e Kosovës (AAK), ka kërkuar nga deputetët e Kuvendit të Kosovës, ta votojnë plotësim-ndryshimin e ligjit për Skemat Pensionale të Financuara nga Shteti.
Shemsedin Dreshaj nga kjo parti ka thënë se propozimi i iniciuar nga partia e tij parasheh që pensionet kontributdhënëse t’i gëzojnë të gjithë pensionistët varësisht nga vitet sa kanë punuar para 1 janarit të vitit 1999.
Dreshaj i ka përmendur rastet kur punëtorët në kohën e okupimit serb ishin larguar nga puna pa dëshirën e tyre, për këtë shkak sipas tij shumë punëtorë nuk kanë mundur ta arrijnë të drejtën për pensione kontriubutdhënëse.
“Siç e dini, kemi rast për një ditë ose një javë, individët e kanë humbur të drejtën për gëzimin e pensionit kontributdhënës. Besoj që kjo iniciativë do të mbështetet nga partitë e tjera parlamentare dhe sidomos nga partia që e ka shumicën në kuvend”, ka thënë Dreshaj.
Dreshaj ka kërkuar që të largohet kushtëzimi që sipas tij është diskriminues që të njihet si pension kontributdhënës vetëm puna prej 15 vjetësh.
“Kërkesë e jona është që të largohet ky kushtëzim diskriminues për punëtorët e viteve të 90-ta, të cilët ishin larguar dhunshëm, pa pajtimin e tyre nga puna atëherë. Kjo nismë legjilstaive i ka kaluar të gjithë hapat paraprakë që të procedohet në parlament dhe të përmbyllet si tërësi. Vlen të theksohet se nga viti i kaluar asnjë person i cili pensionohet nuk i plotëson kushtet që të dalë në pension kontributdhënës. Pra, asnjëri nuk i ka 15 vite të plota”, ka thënë ai.
Sipas Dreshajt, implikimet buxhetore në rast se miratohet ky ligj janë rreth 100 milionë euro.