Pas propozimit të mandatarit të ri nga Lëvizja Vetëvendosje, kryetari i Lidhjes Demokratike të Kosovës, Lumir Abdixhiku, ka deklaruar se situata politike aktuale është e paqëndrueshme dhe Kuvendi nuk ka shumicë parlamentare.
Në një postim në Facebook, Abdixhiku thekson se shfaqja teatrale e mandatarëve pa numra, pa shumicë dhe pa legjitimitet demokratik duhet të marrë fund, duke shtuar se Republika e Kosovës nuk është “material loje për llogaritje të vogla elektorale”.
“Shiqoni qytetarët në sy e tregojuni se nuk ka shumicë. Tregojuni qytetarëve se secila parti shqiptare, ka dhënë verdiktin politik, të deponuar tashmë në Presidencë. Ky verdikt është i qartë e është i thejshtë. Sot, matematikisht, me vullnetin e deklaruar politik, nuk ka mundësi për shumicë”, ka shkruar Abdixhiku.
Ai ka theksuar se çdo vonesë dhe zvarritje shton krizën politike dhe se përgjegjësia për situatën i takon politikës.
“Këto zvarritje janë veç thellime të krizave, për të cilat do të mbahet përgjegjësi politike.”
Abdixhiku ka apeluar gjithashtu te presidentja Vjosa Osmani që të respektojë vullnetin e shumicës shqiptare dhe të deklarojë se nuk ka shumicë parlamentare në Kuvend.