I pari i Lidhjes Demokratike të Kosovës, Lumir Abdixhiku, të dielën e 13 nëntorit do të udhëtoj për në Shtet e Bashkuara të Amerikës.
Sipas zëdhënëses së LDK-së, Sibel Halimi, ai në ShBA do të jetë për një vizitë një javore ku do të takohet me zyrtarë të shtetit amerikan, senatore e kongresmmenë.
“Mund të ju konfirmoj se Kryetari Abdixhiku udhëton këtë të diel për në ShBA, për një vizitë një-javore, me ç’rast ai do të zhvillojë takime të shumta me zyrtarë institucionalë të shtetit amerikan, senatorë, kongresmenë e shumë personalitete të tjera”, ka thënë Halimi për portalin Dukagjini.
Të tjerëve “u shtyhet” vizita në SHBA, Krasniqi javën e ardhshme niset drejt Amerikës
Gjithashtu edhe kryetari i Partisë Demokratike të Kosovës, Memli Krasniqi, ka deklaruar se gjatë javës së ardhshme do të jetë në vizitë zyrtare në Shtetet e Bashkuara të Amerikës.
Kështu ka bërë të ditur Krasniqi për Portalin Dukagjini, duke mos dhënë më tepër detaje.
Ndryshe, ministrja e Drejtësisë, Albulena Haxhiu ka konfirmuar që vizita e saj e paraparë për dhjetor në Shtetet e Bashkuara të Amerikës, është shtyrë pas një takimi me zyrtarë të Ambasadës së SHBA-së në Kosovë.
Ajo ka thënë se kjo vizitë është shtyrë pas një konsultimi të përbashkët me zyrtarët amerikanë, për shkak të situatës aktuale politike në Kosovë.
Haxhiu ka deklaruar se lajmet kinse i është refuzuar viza për vizitën në Shtetet e Bashkuara të Amerikës, janë të pavërteta.