Agon Ramadani, ish-futbollist i njohur i futsallit ka marrë drejtimin e kombëtares A.
Ai u përzgjodh gjatë së premtes të zëvendësonte Arben Simitçiun, i cili u shkarkua nga kjo pozitë.
Ndërkohë, Getart Hyseni ka marrë pozitën e ndihmëstrajnerit.
Ramadani dhe Hyseni ndër vite kanë dhënë kontributin e tyre në futsall duke qenë pjesë e kampionatit vendor, e duke përfaqësuar Kosovën edhe në arenën ndërkombëtare.
“Falë kontributit të dhënë si ndihmës trajner në kombëtaren A, i pari i FFK-së e emëroi Agon Ramadanin përzgjedhës të ri. Ai në këtë pozitë e pason Arben Simitçiun me të cilin kishin punuar bashkë tash e disa vite, ndërkaq Getart Hysenin e angazhoi si ndihmës trajner, duke e bërë pjesë të ekipit Kombëtar në futsall”, thuhej në njoftimin e FFK-së.
Kryetari Ademi u uroi detyrat e reja të dy ish-lojtarëve të futsallit dhe u kërkoi që të punojnë me përkushtimin më të madh që Kosova të arrijë sa më shumë suksese.
Nga ana tjetër, dy të angazhuarit falënderuan kryetarin e FFK-së për besimin e dhënë dhe premtuan se nga përvoja dhe njohuritë e tyre do të japin më të mirën për Kosovën.