Lideri i Bashkimit Demokratik për Integrim, Ali Ahmeti, ka shprehur keqardhje për incidentin e mbrëmshëm ndaj presidentes Vjosa Osmani, ku sigurimi i aeroportit të Shkupit ka tentuar që t’ia marrë telefonin e saj privat dhe ta shtyjnë.
Ai e ka cilësuar këtë si “skandal të papranueshëm diplomatik”.
“E dashur presidente, më vjen shumë keq për incidentin dhe skandalin e papranueshëm diplomatik në aeroportin e Shkupit dhe e dënoj në formën më të ashpër të mundshme”, ka thënë Ali Ahmeti.
Ahmeti ka thënë se turpërohet nga kjo çfarë ka ndodhur.
“Unë skuqem nga turpi i tyre dhe lus të gjithë vëllezërit dhe motrat në Kosovë, por edhe qytetarët tanë, që t’i falin për arsye se nuk dijnë se ç’bëjnë”, ka vijuar ai.
Ahmeti ka kritikuar edhe koalicionin “VLEN”, të cilët u bënë pjesë e ekzekutivit të liderit Hristjan Mickoski.
“Kur nuk kanë turp të shkelin mbi popullin e vet, mbi vullnetin demokratik të qytetarëve në zgjedhje e të vihen në shërbim vasal e servil të tjetër kujt duke na sjell Putin-in e Vuçiç-in në Qeveri, atëherë si pyet askush për asgjë dhe na turpërojnë çdo ditë, nga disa herë me radhë”, përfundoi Ahmeti.