Ambasada e Shteteve të Bashkuara të Amerikës në Kosovë, të martën e 31 janarit duke filluar nga ora 10:00, do të organizojë një diskutim për Asociacionin e komunave me shumicë serbe.
Në këtë takim pritet të marrin pjesë pjesëtarë të shoqërisë civile, zyrtarë qeveritarë, liderë të partive politike dhe diplomatë.
“Më 31 janar, Ambasada e Amerikës do të organizojë një diskutim për Asociacionin e Komunave me shumicë serbe në Kosovë. Kemi ftuar drejtues të shoqërisë civile, zyrtarë qeveritarë, liderë politikë dhe diplomatë për të diskutuar këtë temë të rëndësishme”, thuhej në përgjigjen e Ambasadës amerikane.
Ambasada amerikane ka thënë se diskutimi për Asociacioni konsiston me qëllimin e Shteteve të Bashkuara për ta avancuar integrimin e Kosovës në strukturat evropiane dhe euroatlantike, dhe është si “reflektim për miqësinë tonë të gjatë dhe mbështetjen për popullin e Kosovës”.
Për këtë organizim, Ambasada amerikane në Prishtinë ka thënë se Zyra e kryeministrit të Kosovës, Albin Kurti dhe ajo e presidentes, Vjosa Osmani, kanë konfirmuar pjesëmarrjen.
“Qëllimi ynë është të avancojmë mirëkuptimin e ndërsjellë për përkushtimin ndaj Asociacionit të komunave me shumicë serbe”, thuhet në një përgjigje të zëdhënëses së Ambasadës amerikane, Katherine Judd, dërguar Radios Evropa e Lirë.
Partitë opozitare, Partia Demokratike e Kosovës dhe Lidhja Demokratike e Kosovës dhe Aleanca për Ardhmërinë e Kosovës, po ashtu, e kanë konfirmuar pjesëmarrjen e tyre në diskutimin e organizuar nga ShBA-ja.