Ambasadori i ri britanik në Kosovë, Jonathan Hargreaves, përmes një videoadresimi ka thënë se është shumë i lumtur që do të jetojë në Kosovë, siç është shprehur vetë ai, në një vend kaq frymëzues.
“Jam shumë i lumtur që do të jetoj në këtë vend kaq frymëzues. Po pres me padurim të njihem me ju. Unë dhe familja jemi shumë të kënaqur që do të eksplorojmë malet e mrekullueshme që ka Kosova”, ka thënë ambasadori i ri britanik në Kosovë.
Ai ka dhënë lëvdata për ushqimin dhe gastronominë e Kosovës në përshtypjet e tij të para për vendin, duke shtuar se e admiron Kosovën për shkak të diversitetit kulturor që ka ajo.
Madje ai ka rrëfyer se për herë të parë në Kosovë ka qenë në vitin 2001, asokohe si punëtor i qeverisë britanike.
“Sigurisht në atë kohë shumë njerëz kanë pasur trauma të thella. Institucionet e Kosovës drejtoheshin së bashku nga ndërkombëtarët dhe vendorët. E ardhmja e Kosovës ishte e pasigurt. Por nga ana tjetër, edhe atëherë kafja ishte e shkëlqyer dhe njerëzit dukeshin të lezetshëm, të vendosur dhe shumë të aftë”, ka treguar ai.
Ambasadori britanik ia ka dorëzuar presidentes së Kosovës, Vjosa Osmani, letrat kredenciale, të martën e 5 marsit.