Katër persona kanë mbetur të lënduar, pasi autobusi dykatësh ka përplasur një urë të ulët, duke e lënë edhe automjetin të dëmtuar.
Ky aksident ka ndodhur të mërkurën e 25 majit në një qytet të Anglisë, Sheffield, teksa autobusi ishte duke udhëtuar për në qendrën tregtare Crystal Peaks në Sheffield, raporton BBC.
Pjesa e sipërme e autobusit u shtyp pasi u përplas me urën e këmbësorëve, ku lartësia e urës shihet të jetë 3.5 metra.
Drejtori i Operacioneve Rob Hughes ka thënë se “hetimi i plotë” për përplasjen është nisur, gjithashtu, ka bërë të ditur se katër pasagjerë kanë pësuar “lëndime të lehta” në aksident.
“Shoferi nuk ka pësuar lëndime por është në shok”, ka thënë Hughes.
Po ashtu, ai ka thënë se është ofruar mbështetja dhe ndihma e nevojshme për personat e lënduar dhe të tjerët që janë përfshirë në këtë aksident.