Deputetja britanike, Alicia Kearns, duket se ka bërë publik një informacion të rëndësishëm, për të cilin, institucionet e sigurisë në Kosovë tash e një kohë ishin në dijeni.
Kearns ka thënë se grupe kriminale serbe në veri, po kontrabandojnë armë nga Serbia në Kosovë përmes autoambulancave dhe se ato po i fshehin në kisha.
Sipas kryetares së komisionit parlamentar për mbikëqyrjen e AKI-së, Ganimete Musliu, deputetja Kearns e tha një të vërtetë.
“Fatkeqësisht, deklarata e saj koençidon të jetë e saktë, sepse e kam të konfirmuar që ka prezencë të armatimit në veri të Kosovës, e që është më e keqja po keqpërdoren autoambulancat që të shpërndahen nëpër pika të caktuara dhe jo vetëm në kisha siç e ka potencuar ajo. Nga pozicioni që unë jam, vetëm mund ta konfirmoj që kjo gjë është e vërtetë”, ka thënë Musliu.
Musliu, që nuk dëshiron të jap më shumë detaje, thotë se një nga institucionet kyçe të sigurisë në Kosovë, është duke e kryer punën e saj mirë.
“Vlen të theksohet që AKI është në krye të detyrës dhe po e kryen punën e saj me sukses. Por, nuk mjafton vetëm puna e AKI-së. Duhet të koordinohet i gjithë faktori i sigurisë në vend, të kyçen edhe gjykatat edhe prokuroria e kështu me radhë. Ajo që po e dëmton gjithë procesin atje dhe parandalimin e këtyre gjërave është politika” ka deklaruar ajo.
Intervenimi i Policisë së Kosovës në këtë rast duket i vështirë.
Prandaj, Mentor Vrajolli nga QKSS, thotë se patjetër duhet të ketë koordinim me KFOR-in.
“Në këtë rast është jashtëzakonisht e rëndësishme të jetë i përfshirë edhe KFOR-i karshi Policisë së Kosovës. Kjo për faktin se futja e një sasie të madhe të armatimit, gjithnjë nëse rezulton të jetë e vërtetë, kjo përbën edhe kërcënim ndaj integritetit territorial të Kosovës”, ka deklaruar ai.
Vrajolli, gjithashtu thekson se në rast se Policia e Kosovës ndërhynë e vetme, mund të keqkuptohej.