Të hënën e 19 dhjetorit, Policia e Kosovës ka njoftuar se Njësia Policore nga Drejtoria për Hetimin e Trafikimit me Narkotik Prishtinë, pas një pune operativo hetimore në magjistralen Prishtinë-Mitrovicë më saktësisht në fshatin Shkabaj, ka ndaluar veturën e tipit Golf V ngjyrë hiri të cilën e drejtonte personi F.M (mashkull kosovar) dhe pasagjer ishte M.H (mashkull kosovar).
Njoftohet se gjatë kontrollit tek drejtuesi i automjetit në trupin e tij është gjetur një qese me substancë të dyshuar narkotike e llojit marihuanë me peshë 3.0 gram, ndërsa tek pasagjeri nuk është gjetur diçka e dyshuar, të njëjtit janë shoqëruar për intervistim.
“Në lidhje me rastin është njoftuar Prokurori Kujdestar nga Departamenti i Krimeve të Rënda, kurse me urdhër të GJ.P.P është kryer bastisje tek shtëpia e të dyshuarit F.M”, ka njoftuar Policia e Kosovës.
Në cilësi të provave materiale janë gjetur dhe konfiskuar katër qese me substancë të dyshuar narkotike e llojit marihuanë me peshë të përgjithshme prej 3 mijë 115 gram, një qese me substancë të dyshuar narkotike e llojit kokainë me peshë 22.9 gram, dy peshore digjitale.
Po ashtu janë gjetur dhe konfiskuar një shiringë e mbushur me vaj kanabisi, gjashtë copë fishek te armës te kalibrit nn, para të gatshme në vlerë 350 euro, një telefon i tipit Iphone 13 dhe një veturë e tipit Golf V.
“Me urdhër të prokurorit kujdestar i dyshuari F.M pas intervistimit është dërguar në qendrën e mbajtjes për 48 orë, rasti vazhdon të hetohet nga DHTN Prishtinë”.
Mes tjerash thuhet se Policia e Kosovës mbetet e përkushtuar në parandalimin e të gjitha dukurive negative dhe veprave penale në Kosovë.