Policia e Shqipërisë ka sekuestruar drogë, tritol dhe municion luftarak gjatë operacionit “Varkëtari”, zhvilluar mes Pukës dhe Tropojës.
Në pranga ka rënë një 29-vjeçar me inicialet L.P., i cili dyshohet se kishte sjellë materialet me varkë nga Puka dhe synonte t’i trafikonte drejt Kosovës.
Gjatë kontrollit në fshatin Dushaj, në makinën “Volkswagen” të të dyshuarit u gjetën 1.2 kg kanabis, 405 gram tritol, 51 kapsolla detonatore, 5 metra fitil zjarrpërcjellës, municion luftarak dhe një shumë parash.
“Ky shtetas u kap në flagrancë nga shërbimet e Policisë, në fshatin Dushaj, duke lëvizur me automjetin tip “Volkswagen”, në të cilin kishte fshehur në brendësi të bagazhit lëndën narkotike, eksplozivin dhe municionin luftarak, të cilat dyshohet se i kishte transportuar me varkë nëpërmjet liqenit, nga fshati Apripë, Pukë, deri në Tropojë, ku kishte parkuar automjetin me qëllim shmangien e kontrollit të Policisë”.
Autoritetet thonë se po vijojnë hetimet në bashkëpunim me Prokurorinë dhe policinë e Kosovës, për identifikimin e personit që pritej t’i blinte materialet në Kosovë.