Një i dyshuar, E.Q. 24-vjeçar, i cili kishte një pozitë menaxheriale në një kompani private, është arrestuar nën dyshimin se ka bërë përfitim personal në mënyrë të paligjshme.
Policia e Kosovës ka bërë të ditur se i dyshuari në Ferizaj në muajt janar – mars të vitit 2024 kishte arritur që përmes faturave dhe klientëve fiktivë, për vete të përfitojë ilegalisht një shumë të hollash në vlerë 35 mijë euro, duke i shkaktuar dëm kompanisë ku ai punonte.
“Më këto veprime, i dyshuari E.Q. duke mos zbatuar detyrimet që rrjedhin nga kontrata dhe përgjegjësitë si menaxher, dyshohet të ketë kryer veprën penale “Keqpërdorimi i autorizimeve ekonomike“ nga neni 284 i KPRK-së”, thuhet në njoftimin e Policisë.
24-vjeçari është intervistuar në prani të avokatit të tij mbrojtës, ku pas intervistës, me aktvendim të prokurorit, është dërguar në mbajtje për 48 orë.
“Policia e Kosovës mbetet e përkushtuar në zbatimin e ligjit dhe arrestimin e të gjithë personave që kryejnë apo tentojnë kryerjen e veprave penale”.