Një person është arrestuar në Prishtinë nën dyshimet se është përfshirë në një grabitje të bankës në sheshin “Nëna Terezë”.
Lajmin për Portalin Dukagjini e ka konfirmuar zëdhënësja e Policisë për rajonin e Prishtinës, Flora Ahmeti, e cila po ashtu bëri të ditur se i dyshuari me inicialet N.D është arrestuar pak metra larg vendit të ngjarjes.
“Arrestohet një person për grabitje. Sot nga zyrtarët policorë, është arrestuar një person, për të cilin ekziston dyshimi i arsyeshëm se është i përfshirë në një rast të grabitjes, që ka ndodhur sot rreth orës 13:00, në filialin e një banke në sheshin ‘Nëna Terezë’ në Prishtinë. Personi i dyshuar, N.D, mashkull, është arrestuar menjëherë pas raportimit të rastit, pak metra larg nga vendi i ngjarjes”, ka thënë ajo.
Kurse i përfshirë dyshohet të jetë edhe një person tjetër, i cili është ende në arrati.
“Lidhur me këtë rast, policia është në kërkim të personit të dytë të dyshuar, i cili aktualisht ndodhet në arrati”, ka thënë Ahmeti.