Inspektorati Policor i Kosovës, respektivisht, hetuesit e Departamentit të Hetimeve kanë arrestuar të martën, një zyrtar policor në Drejtorinë Rajonale të Mitrovicës së Veriut me dyshimin se, i njëjti, ka kryer veprën penale ”Keqpërdorim i detyrës zyrtare apo autoritetit” dhe ”Manipulim me prova”.
Pasditen e së martës, Inspektorati Policor përmes rrugëve operative, kishte pranuar informacione se ky zyrtar policor dyshohet se ka dëmtuar disa kamera të sigurisë dhe pajisje të tjera në afërsi të vendit të ngjarjes, ku është zhvilluar të hënën operacioni i përbashkët antidrogë i policisë dhe doganës në fshatin Izvor të Zveçanit.
Pas pranimit të këtyre informacioneve, hetuesit e IPK-së në koordinim me prokurorinë kanë ndërmarrë veprime hetimore, pas të cilave zyrtari policor i dyshuar në këtë rast është arrestuar sot në mbrëmje, kurse nga prokurori kompetent i është caktuar masa e ndalimit për 48 orë, thuhet në njoftimin e IPK-së.
Hetuesit e IPK-së në koordinim të plotë me Prokurorinë e Shtetit do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast.