Komisioni për Çështje Politike dhe Demokraci i Asamblesë Parlamentare, ka rekomanduar që Kosova të bëhet anëtare e Këshillit të Evropës.
Duke miratuar një projekt-opinion gjatë një takimi të mbajtur të mërkurën në Paris, bazuar në një raport të Dora Bakoyannis (Greqi, EPP/CD), komiteti mirëpriti një listë të gjerë të zotimeve të bëra me shkrim nga autoritetet e Kosovës.
Hapi i radhës, sipas këtij komiteti, do të jetë më 18 prill, kur do të hidhet në votim ky raport para Asamblesë Parlamentare në përbërjen e saj të plotë.
Anëtarësimi i Kosovës në Këshillin e Evropës do të ishte katalizator që “Kosova të vazhdonte të bënte përparim në forcimin e të drejtave të njeriut, demokracinë dhe sundimin e ligjit si dhe të adresojë sfidat dhe çështjet shqetësuese”, ka thënë Komiteti për Politikë dhe Demokraci.
Sa i përket themelimit të Asociacionit të komunave me shumicë serbe, në njoftimin e Komitetit pas takimit të 27 marsit është thënë se ai duhet të jetë një “angazhim pas anëtarësimit për Kosovën” që do të ndihmonte të sigurojë mbrojtje për të drejtat e serbëve në Kosovë,
Ndërsa, sa i përket shpronësimit të pronave në veri, Komiteti ka thënë se ato duhet të kryhen “duke respektuar ligjin” dhe në përputhje të plotë me Planin e Ahtisaarit.
Kush votoi kundër rekomandimit për anëtarësimin e Kosovës në KiE?
Përmes njoftimit, Komiteti ka thënë po ashtu se është në dijeni të “përkeqësimit të situatës së sigurisë në komunat në veri të Kosovës”, duke theksuar se “rreziku për dhunë në Kosovë është i madh” dhe se siguria varet “nga mbrojtja e të drejtave të komunitetit serb, përshkallëzimi i tensioneve dhe normalizimi i raporteve me Serbinë”.
Duke pasur parasysh numrin e vendeve anëtare të Këshillit, që nuk e njohin Kosovën si shtet, Komiteti bëri thirrje për “diplomaci, dialog dhe kompromis”, duke i bërë thirrje Komitetit të Ministrave që të sigurohen që anëtarësimi i Kosovës të bëhet pa “paragjykime ndaj qëndrimeve të shteteve individuale sa i përket shtetësisë së Kosovës”.