Administrata Tatimore e Kosovës ka njoftuar se ka mbledhur mbi 1 milion euro borxhe. Sipas njoftimit të ATK-së, janë kryer kontrolle në 22 biznese që kishin borxh rreth 3 milionë euro.
“Departamenti i Mbledhjes së Detyrueshme ka vazhduar me aktivitete të intensifikuara për mbledhjen e borxheve. Aktiviteti i masave të sforcuara është i dyti me radhë brenda pak ditësh, ku dje, me datë 31 maj 2022 janë ndërmarrë veprime te 22 subjekte biznesore, të cilat kishin obligim ndaj ATK-së 2.9 milionë euro”, ka njoftuar Administrata Tatimore e Kosovës.
“Veprimet e mbledhësve tatimorë kanë rezultuar të suksesshme, duke u kryer pagesat e menjëhershme të mbi 1 milion eurove nga ana e bizneseve borxhlinj”, ka shtuar në njoftim ATK-ja.
Administrata Tatimore e Kosovës ka theksuar se pjesa tjetër do t’i paguajnë borxhet me këste.
“Pjesa tjetër do të vazhdojë të trajtohet duke i paguar borxhet përmes marrëveshjeve me këste. Aktivitetet në fjalë janë zhvilluar në Prishtinë, Prizren, Pejë, Ferizaj, Mitrovicë e Veriut, Kaçanik, si dhe në Drenas”, përfundon njoftimi.