Sipas autoriteteve britanike, Rusia dhe Ukraina po përballen me një numër të lartë të ushtarëve të vrarë, ndërsa forcat e Kievit, përmes një kundërofensive, po përpiqen të çlirojnë zonat e pushtuara nga forcat e Kremlinit.
Ndërkohë, një plan paqeje i prezantuar nga udhëheqësit e shtatë vendeve afrikane, me qëllimin për t’i dhënë fund luftës gati 16-mujore, u refuzua të premten nga presidenti rus Vladimir Putin, një ditë pasi ai u refuzua nga presidenti ukraianas Volodymyr Zelenskyy.
Rusia mund të jetë duke u përballur me humbjet më të larta që nga kulmi i betejës për Bakhmutin në mars, vlerësuan zyrtarët e Britanisë, në një raport të përditësuar mbi fazat e para të kundërofensivës së ushtrisë ukrainase.
Sipas raportit britanik, luftimet më të ashpra po zhvillohen në provincën juglindore të Zaporizhias, rreth Bakhmutit dhe në provincën lindore të Donetskut.
Raporti thotë se Ukraina shënoi përparime të vogla në këto zona, ndërsa forcat ruse po kryejnë operacione mbrojtëse, relativisht efektive, në jug të Ukrainës.
Kievi njoftoi sot se gjatë 24 orëve të fundit, Rusia kreu 43 sulme ajrore dhe 55 sulme të tjera me raketa.
Guvernatori i Donetskut, Pavlo Kyryleno, tha se dy civilë u vranë dhe tre të tjerë u plagosën.
Një civil u vra dhe katër të tjerë u plagosën në provincën e Khresonit, ndërsa në Zaporizhia u plagos një person pas sulmeve ruse në 20 vendbanime.
Vladimir Rogov, zyrtar i administratës së emëruar nga Moska në rajonin pjesërisht të pushtuar të Zaporizhias, tha sot se forcat ukrainase morën kontrollin e fshatit Piatikhatki.
Forcat ukrainase njoftohet se shkatërruan një depo të rëndësishme municioni pranë qytetit port të pushtuar nga Rusia, Heniçesk.
Sipas analistëve perëndimorë, kundërofensiva e Ukrainës me armët e përparuara të perëndimit, përgjatë vijës frontale prej 1 mijë kilometrash, mund të zgjasë.
Një nismë paqeje e shtatë vendeve afrikane nuk dha shenja përparimi.
Përpjekja e udhëheqësve afrikanë për t’i dhënë fund luftës gati 16-mujore u refuzua nga presidenti rus Vladimir Putin, një ditë pasi plani u cilësua si i pazbatueshëm edhe nga presidenti ukrainas Volodymyr Zelenskyy.
Presidenti ukrainas tha se çdo bisedë paqeje duhet të ketë si parakusht tërheqjen e forcave të Moskës nga territoret e pushtuara ukrainase, diçka që Rusia thotë se është e panegociueshme.
Ndërkohë, numri i të vdekurve nga përmbytjet si pasojë e shkatërrimit të digës në Kakhovka është rritur.
Ministria e Brendshme ukrainase tha se numri i viktimave në territoret e kontrolluara nga Kievi është 16, ndërsa zyrtarët rusë thanë se 29 persona vdiqën në territoret e kontrolluara nga Moska.
Rusia dhe Ukraina akuzojnë njëra-tjetrën për shkatërrimin e digës më 6 qershor, raporton Zëri i Amerikës, përcjell Dukagjini.com.