Avokati i familjes Dehari, Tomë Gashi, ka kërkuar nga deputeti i Lëvizjes Vetëvendosje, Haki Abazi që të gjitha provat që i ka t’i dërgojë në Prokurorinë Speciale, pas deklaratave për zhdukjen e mostrave të Astrit Deharit.
Nëpërmjet një postimi në rrjetin social Facebook, Gashi ka bërë të ditur se ka dorëzuar kërkesë në Prokurorinë Speciale për marrjen në pyetje të Abazit në cilësinë e dëshmitarit.
“Haki Abazi e ka borxh ndaj Astrit Deharit dhe e ka obligim ligjor që të dëshmojë dhe t’i dorëzojë të gjitha provat që ai pretendon se i ka në Prokurori e që kanë të bëjnë me rastin e zhdukjes së mostrave biologjike dhe të gjakut të Astritit. Ato janë zhdukur nga IML-ja në Prishtinë e që për zhdukjen e tyre është bërë e ditur para dy muajsh. Askush nuk mund të intervistohet para se të intervistohet Abazi”, ka shkruar Gashi.
“Prokuroria Speciale e Kosovës, njofton opinionin publik se ka dëgjuar me vëmendje deklaratat e deputetit të Kuvendit të Kosovës, Haki Abazi, dhënë sot për media, dhe se i njëjti së shpejti do të ftohet për intervistim”.
Kështu ka bërë të ditur Ekrem Lutfiu, zëdhënës nga Prokuroria Speciale e Republikës së Kosovës.
Ndryshe, të enjten, deputeti i Lëvizjes Vetëvendosje (VV), Haki Abazi në një konferencë për media ka thënë se pamjet e kamerave në Institutin e Mjekësisë Ligjore (IML) mund të dëshmojnë se çfarë ka ndodhur me zhdukjen e mostrave në rastin e aktivistit, Astrit Dehari.
Abazi ka thënë se kryeministri Albin Kurti e të tjerë duhet të merren në pyetje nga Prokuroria për rastin në fjalë.
Ndryshe, mostrat e Deharit u zhdukën në fillim të dhjetorit të vitit të kaluar.
Ndërsa, për këtë rast u pezulluan nga puna katër zyrtarë të IML-së.