Avokati i ish-presidentit të Kosovës Hashim Thaçi, Gregory Keohe, ka thënë se Ushtria Çlirimtare e Kosovës (UÇK) nuk ka pasur strukturë, sepse ajo ishte e përbërë sipas tij nga qytetarë civilë të cilët ishin vullnetarë në ushtri.
“Struktura e UÇK-së e bërë në fillim të vitit 1998, ishte një forcë e re guerile e përbërë nga grupe lokale vullnetarësh të ngritur për të mbrojtur shtëpitë e tyre. Këta vullnetarë ishin fermerë, mësues, punëtorë, studentë dhe civilë të tjerë nga qytetet, qytezat dhe fshatrat e Kosovës dhe diasporës. Si rezultat, njësitë u bashkuan në nivel lokal, me besnikëri ndaj drejtuesve lokalë të fshatit. Çdo përpjekje në zhvillim për organizim [të UÇK-së] në pranverën e vitit 1998 u shkatërrua nga Serbia”, ka deklaruar avokati i Thaçit.
Ndërkohë ai ka sqaruar rolin e 9 drejtorive të Shtabit të Përgjithshëm të UÇK-së dhe rolin e Thaçit.
“Në nëntor 1998, si pjesë e tentativës për riorganizim pas ofensivës verore serbe që shkatërroi UÇK-në, UÇK-ja rikonfirmoi Azem Sylën si komandant të përgjithshëm. Po ashtu, janë emëruar edhe dy zëvendëskomandant, asnjëri prej të cilëve nuk ishte Thaçi. Por, Thaçi ishte kreu i njërës prej nëntë drejtorive, drejtorisë politike, pa përgjegjësi komanduese mbi trupat e UÇK-së në terren”, ka thënë avokati.
Më tutje, avokati e ka treguar periudhën në të cilën Thaçi e kishte lëshuar Kosovën gjatë luftës.
“Më 16 nëntor 1998, Hashim Thaçi u largua nga Kosova për në Evropën Perëndimore dhe nuk u kthye në Kosovë deri më 9 mars 1999”, ka përfunduar ai.