Deputetja e Lidhjes Demokratike të Kosovës (LDK), Hykmete Bajrami, e ka kritikuar kryeministrin Albin Kurti, për çasjen joserioze ndaj bizneseve të Kosovës.
Bajrami ka thënë se Kurti po frikësohet t’i takojë bizneset e Kosovës, për këtë arsye sipas saj, ato po ikin në Shqipëri duke u “strehuar”, te kryeministri i Shqipërisë, Edi Rama.
“Kryeministri po ka frikë t’i takojë bizneset, ata kanë gjetur strehim diku tjetër, po shkojnë po e takojnë kryeministrin e Shqipërisë. Kurti ka vizituar Silicon Valley, dhe nuk e ka pasë asnjë biznes me vete. Ata në Greqi i ka takuar në mënyrë sekrete, kurse biznesmenët kosovarë po shkojnë te kryeministri i Shqipërisë”, ka deklaruar ajo.
Tutje, Bajrami ka thënë se masat që po i merr Qeveria e Kosovës, krijojnë shtet të lëmoshës dhe jo shtet zhvillimor. Ato masa, sipas Bajramit, vetëm se po e thellojnë krizën.
Ajo i ka bërë thirrje kryeministrit Albin Kurti, që të takohet me bizneset, sepse sipas saj, ato punësojnë dhe jo Qeveria.