Deputetja e Lidhjes Demokratike të Kosovës (LDK), Hykmete Bajrami, u ka kërkuar falje qytetarëve për gjuhën e përdorur në seancën e thirrur dje nga opozita për kontratat njëburimore.
Bajrami ka thënë se qytetarët e vendit janë motivi i saj për angazhim politik, pa marrë parasysh se kë e votojnë, dhe se, sipas saj, liria e bindjes së tyre për të është e shenjtë.
“Dje kur u debatua për kontratat njëburimore të Qeverisë si burim korrupsioni jam përpjekur të zbërthej korrupsionin që ka përfshirë Lëvizjen Vetëvendosje nga Albin Kurti te Nagip Krasniqi e nga Martin Berishaj deri te Ridvan Muharremi i rezervave shtetërore. Kjo hajni e një mendësie politike që ka ardhë në pushtet me flamurin e antikurropsionit, më ka nxitur të demaskoj mashtrimin, me fjalë ndoshta të papërshtatshme për kulturën dhe bindjet politke që unë përfaqësoj”, ka thënë Bajrami.
Deputetja e LDK-së është shprehur se VV-ja ka ardhur në pushtet duke gënjyer, shpifur e akuzuar secilin që i ka dalë përpara.
“Edhe në seancën e fundit shpifën, gënjyen për t’i mbuluar hajnitë dhe faljen e tokës për Manastirin e Deçanit. Pasi ata nuk kanë moral në politikë, nuk do të thotë që ne tjerët nuk duhet ta ruajmë moralin dhe dinjitetin!”, ka thënë tutje ajo.