Publicisti Mero Baze, njohës i politikës në Kosovë dhe Shqipëri, ka folur se çfarë roli kishte pasur themelimi i Lidhjes Demokratike të Kosovës(LDK) për Shqiptarët e Kosovës.
Sipas publicistit Baze, shqiptarët asnjëherë nuk i kishin zgjedhur përfaqësuesit e tyre pasi gjithmonë iu kishte zgjedhur Beogradi.
“Më themelimin e LDK-së, në dhjetor të vitit 1988, për herën e parë shqiptarët e Kosovës, i kanë zgjedhur përfaqësuesit e vetë politik, që nga vitit 1918 atyre iu kishte zgjedhur Beogradi” përfaqësuesit, ka deklaruar Baze.
Më tej, ai ka shtuar se përfaqësuesit e zgjedhur në vitin 1988 janë e “vetmja gjë që i ka njohur ndërkombëtarisht shqiptarët e Kosovës”.
“Ish-presidenti Ibrahim Rugova, është pritur nga të gjithë ndërkombëtarët. Është pritur në Shtëpinë e Bardhë, nga vendet tjera të perëndimit, dhe është pritur si përfaqësues i shqiptarëve të Kosovës”.
Tutje ai ka folur për meritat e përfaqësuesëve të cilët ishin zgjedhur në vitin 1988.
“Duke vendosur që ta zgjedh çështjen e Kosovës nëpërmjet rrugës demokratike dhe standardeve evropiane, është bërë i pranueshëm problemi i Kosovës, se përndryshe për problemin e Kosovës do të ishte e pa mundur të flisje në Perëndim”, ka theksuar ai.
“Kosova kishte ndryshuar qasje ndaj pushtuesit të saj, sepse nuk e nisi si një luftë për bashkim me Shqipërinë komuniste por, si një demokratizim pas rënies së murit të Berlinit, dhe kjo ishte arma që Kosova i çarmatosi armiqtë e saj brenda Jugosllavisë në raport me Perëndimin”, ka shtuar njohësi i politikës Baze.
Baze ka përfunduar duke thënë se Jugosllavia e vitit 1989, kishte një imazh shumë më të mirë se sa që gëzon Serbia tani.