Bashkimi Evropian ka mirëpritur mbajtjen e zgjedhjeve parlamentare dhe presidenciale në Turqi, si dhe daljen e lartë të qytetarëve në zgjedhje, të cilat u zhvilluan të dielën e 14 majit.
Në një komunikatë për media thuhet se BE-ja vlerëson përkushtimin e popullit turk për të ushtruar të drejtën demokratike për të votuar.
“BE-ja mirëpret mbajtjen e zgjedhjeve parlamentare dhe presidenciale që u zhvilluan në Turqi të dielën më 14 maj dhe pjesëmarrjen e lartë si një shenjë e qartë e përkushtimit të popullit turk për të ushtruar të drejtën e tij demokratike për të votuar”, thuhet në komunikatën e BE-së.
BE-ja thuhet se i kushton rëndësi “të madhe nevojës për zgjedhje transparente, gjithëpërfshirëse dhe të besueshme”, në një betejë të barabartë.
“Ne vërejmë gjetjet dhe konkluzionet paraprake të Misionit Ndërkombëtar të Vëzhgimit të Zgjedhjeve të OSBE-së dhe Këshillit të Evropës dhe u bëjmë thirrje autoriteteve turke të adresojnë mangësitë e identifikuara”, vijon komunikata.
BE-ja pret me padurim që parlamenti i ardhshëm të marrë funksionet e tij.
Ndryshe, kreu i Bordit të Lartë Zgjedhor të Turqisë (YSK) ka konfirmuar se zgjedhjet presidenciale do të shkojnë në balotazh midis presidentit Tayyip Erdogan dhe rivalit të tij kryesor Kilicdaroglu, pasi asnjëri nuk mund të arrijë pragun e 50 për qind për të fituar plotësisht.
Kryetari i YSK, Ahmet Yener, u tha gazetarëve se me rreth 35,000 vota të mbetura për t’u numëruar, Erdogan kishte 49.51 për qind mbështetje dhe rivali i tij Kemal Kilicdaroglu kishte 44.88 për qind.