Kuvendi i Kosovës të enjtën e 28 korrikut, ratifikoi marrëveshjen Kornizë të Partneritetit Financiar IPA III me Bashkimin Evropian.
Kjo marrëveshje i mundëson Kosovës të vazhdojë të marrë ndihmë teknike dhe financiare nga Bashkimi Evropian.
Në këtë rast, ambasadori i BE-së në Kosovë, Tomas Szunyog, kishte thënë se, “Ishte kënaqësi të shohim se ratifikimi i Marrëveshjes Kornizë të Partneritetit Financiar IPA III ka marrë mbështetje të madhe ndërpartiake në Kuvend”.
Ai ndër të tjerash tha se Fondet e IPA III do të përdoren për financimin e aktiviteteve në fushën e sundimit të ligjit dhe të drejtave të njeriut, qeverisjes së mirë, zhvillimit ekonomik, infrastrukturës si dhe energjisë e mjedisit.
Tomas Szunyog shtoi se këto aktivitete do ta mbështesin edhe më tej Kosovën në integrimin e saj evropian dhe do të ndihmojnë në përmirësimin e cilësisë dhe standardit të jetesës për të gjithë njerëzit në Kosovë.
BE-ja mbetet partneri më i madh tregtar dhe ofruesi më i madh i ndihmës financiare i Kosovës.
Kosovës i janë ndarë përmes programit IPA I dhe IPA II gjithsej 1.21 miliardë euro.