Vizita e Marko Gjuriqit në Shtëpinë e Bardhë, është bërë alarmi i fundit për ne.
Kjo vizitë e ambasadorit serb në Shtëpinë e Bardhë ka nxitur debat të gjerë për qasjen e Kosovës, ndaj aleatit të shqiptarëve, Shteteve të Bashkuara të Amerikës.
“Pavarësisht se e kishim lajmëruar orientimin krejtësisht të gabuar dhe qasjen amatoreske të kësaj qeverie, nuk do ta kishim besuar kurrë se ajo do të bënte që të hapeshin dyert e Amerikës për Serbinë dhe ti mbylleshin Kosovës”, ka thënë në rrjetin social, Facebook, Bekë Berisha.
Situata është tepër shqetësuese, sipas këtij të fundit, në postimin e tij në Facebook thuhet se, veprimet e qeverisë Kurti janë amatore, dhe kanë dërguar në izolim Kosovën, si dhe i kanë lënë hapësirë Serbisë që të bëhet pro amerikane. Ndërkaq, Berisha bëri thirrje ndaj shtetit shqiptar, duke thënë që, pavarësisht kontributit të çmueshëm që ka dhënë gjithmonë në krahun e diplomacisë së Kosovës, të shtojë punën e saj diplomatike për t’i dalë në ndihmë shtetit të Kosovës.
“Albin Kurti arriti në më pak se një vit ti kthejë mbrapa të gjitha arritjet e Kosovës në rrafshin diplomatik duke e izoluar Kosovën, jo vetëm nga Amerika, por edhe nga Tirana. Në vitin e parë të kësaj qeverie, diplomacia e Kosovës ka shërbyer më shumë për të sulmuar Tiranën dhe UÇK-në, sesa për të ndërtuar e mirëmbajtur marrëdhënie me miqtë tanë” ka shkruar Berisha.
Sipas këtij të fundit, lufta e Ushtrisë Çlirimtare të Kosovës (UÇK) ishte serioze, e guximshme dhe determinuese në krijimin e aleancës me Shtetet e Bashkuara të Amerikës, Organizatën e Traktatit të Atlantikut të Veriut (NATO), dhe me shtetet tjera perëndimore. Kjo ishte meritë e spektrit politik të kohës që u bashkua, pavarësisht ndarjeve, dhe zhvilloi një diplomaci të qartë pro amerikane e evropiane duke e çuar Kosovën drejt pavarësisë së saj. Kjo aleancë nuk ishte cenuar asnjëherë deri me ardhjen në pushtet të Albin Kurtit dhe Vjosa Osmanit.