Të premten e 14 tetorit, zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, së bashku me ministren e Arsimit, Arbërie Nagavci, kanë zhvilluar takimin e rregullt me organizatat e shoqërisë civile.
Në këtë takim, u diskutua mbi prioritetet që rrjedhin nga Agjenda Evropiane e Reformave si, përmirësimi i cilësisë së përgjithshme në sektorin e arsimit, sigurimi i qeverisjes transparente të institucioneve arsimore dhe rritja e qasjes në arsim.
Qeveria i ka vlerësuar akterët e shoqërisë civile si partnerë në procesin e integrimit evropian, ku secila palë ka rolin e vet dhe mund të japë kontribut në hartim, monitorim, zbatim apo komunikim të reformave.
“Takimi i djeshëm ishte i 5-ti me radhë sektorial, e këtë herë në fushën e arsimit. Përmes këtij takimi synojmë përfshirjen e shoqërisë civile në konsultime drejtpërdrejtë me institucionet zbatuese në kuadër të reformave legjislative dhe të politikave, përpara se ato të vendosen në platformën për konsultime publike”, ka shkruar Bislimi në Facebook.
Bislimi ka thënë se procesi i integrimit evropian është aq kompleks dhe kërkues saqë kërkon mobilizimin e gjithë potencialit vendor, prandaj çdo ndihmë dhe kontribut është i mirëseardhur.
“Si Qeveri, bazuar në arritjet tona, llogarisim në përkrahjen e shoqërisë civile në arritjet sektoriale duke qenë se këtë vit do të aplikojmë dhe për anëtarësim në BE, me synim marrjen e statusit kandidat”, thuhet tutje.
Ndërkaq, takimet e radhës planifikohen të mbahen në fushën e punësimit, çështjeve sociale dhe energjisë, në muajt nëntor dhe dhjetor.