Komisioni për Administratë Publike, Pushtet Lokal, Media dhe Zhvillim Rajonal në mbledhjen e sotme është duke shqyrtuar në parim Projektligjin për Komisionin e Pavarur të Mediave (KPM).
Ky projektligj mes tjerash synon që video dhe audio-materialet e publikuara në platformat për shpërndarjen e videove dhe mediat online të kontrollohen nga Komisioni i KPM-së.
Ndonëse ka marrë kritika të shumta nga organizata të punës së mediave dhe gazetarëve në Kosovë, ky projektligj tani pritet të përcillet në Kuvend.
Zëvendëskryeministri i Kosovës, Besnik Beslimi, ka thënë se ky projektligj është në harmoni të plotë me direktivën e Bashkimit Europian për Mediat dhe sipas tij, siguron mjedis konkurrues dhe kushte të barabarta për secilin shërbyes të produkteve mediale.
“Është e pashmangshme të bëjmë një mjedis konkurrues, kushte të njëjta për secilin shërbyes të produkteve mediale”, ka deklaruar Bislimi.
Ai tha se ky projektligj do të rrisë transparencën e pronësisë së mediave.
“Kemi qenë dëshmitarë të dëmeve nga mungesa e rregullave që kërkojnë transparencë për pronësinë e mediave. Transparenca në pronësinë e medias është e lidhur me të drejtën e shprehjes.”, ka shtuar Bislimi.
Për projektligjin e ri të Komisionit të Pavarur të Mediave javën e kaluar, KPM-ja dhe Asociacioni i Gazetarëve të Kosovës kanë mbajtur një konferencë të jashtëzakonshme, teksa kanë akuzuar qeverinë se po tenton “t’i kontrollojë” mediat.