Një person ka mbetur i vdekur dhe një tjetër është plagosur si pasojë e të shtënave me armë zjarri që kanë ndodhur mëngjesin e sotëm në Gjakova.
Rasti ka ndodhur rreth orës 05:30 në rrugën “Vëllezërit Frashëri”, ku dy burra, të moshës madhore, janë qëlluar me armë zjarri.
Zëdhënësi i Policia e Kosovës për rajonin e Gjakovës, Sheremet Elezaj, konfirmoi për Dukagjinin se si pasojë e plagëve të marra njëri nga viktimat ka ndërruar jetë në vendin e ngjarjes, ndërsa vdekja e tij është konstatuar nga ekipi mjekësor.
Personi tjetër ka mbetur i plagosur dhe është dërguar për trajtim mjekësor.
Sipas policisë, njësitë përkatëse kanë dalë menjëherë në vendin e ngjarjes dhe është njoftuar edhe prokurori i shtetit, i cili po ashtu ka dalë në vendngjarje.
Aktualisht, policia po ndërmerr veprimet e nevojshme hetimore për arrestimin e të dyshuarit dhe për zbardhjen e plotë të rrethanave të kësaj ngjarjeje.