Në mbrëmjen e së enjtes, Ambasada e Republikës së Kosovës në Holandë, organizoi një pritje për zëvendëskryeministrin e parë të Kosovës, Besnik Bislimi, me mërgatën shqiptare në Holandë.
Sipas njoftimit për media, zëvendëskryeministri Bislimi theksoi se qeveria ka vëmendje të veçantë për mërgatën dhe e vlerësoi atë për rolin kyç dhe rëndësinë që përfaqëson.
“Ai u njoh me historitë e tyre të suksesit nga studentë të shkencave sociale deri tek ekspertët ligjorë dhe sipërmarrësit”, thuhet në njoftim.
Tutje, Bislimi ka thënë se njerëzit dhe profesionistët e duhur në vendet e duhura janë thelbësorë për zhvillimin e progresin e vendit, duke shprehur interesimin si qeveri për të tërhequr profesionistë të talentuar, si brenda e po ashtu dhe jashtë vendit.
Ai i falënderoi mërgimtarët për gjithë kontributin e dhënë për Kosovën, duke theksuar edhe domosdoshmërinë e thellimit të bashkëpunimit.
“Mërgata mbetet pjesë kyçe e përpjekjeve tona për zhvillim konstant e të qëndrueshëm”, thuhet tutje.