Driloni nga linja e autobusit “Bici.com”, në një lidhje direkte në “Debat Plus” në RTV Dukagjini ka thënë se në Merdare iu kanë treguar se rruga është e bllokuar përtej kufirit, në territorin e Serbisë.
“Kanë dalë disa persona, kanë bllokuar rrugën dhe nuk lejojnë qarkullimin”, tha Driloni se këto ishin fjalët që i kishin thënë në Merdare.
Ai tutje tregoi se kishin marrë informacione se nuk lejohej kalimi i kufirit nga automjetet dhe autobusët me targa të Kosovës.
Sharr Jakupi, shef i kabinetit të ministres Donika Gërvalla, ka njoftuar se në territorin e Serbisë, në afërsi të pikave kufitare në Jarinjë dhe në Merdare, për shkak të protestave që po mbahen, nuk është i mundur kalimi i autobusëve dhe kamionëve që vijnë nga Kosova.
Ai në një postim në Facebook, ka thënë se nuk është i sigurt për momentin as kalimi i veturave.
“Nëse keni hyrë tashmë në Serbi, atëherë ju lutemi t’i përdorni pikat kufitare ne Mutivodë, Dheu i Bardhë ose të merrni rrugë përmes Maqedonisë së Veriut (pikë-kalimi kufitar i Preshevës) përmes Shkupit.Nëse nuk keni hyrë tashmë në Serbi, ju lutemi, mos udhëtoni përmes Serbisë.Duke marrë parasysh faktin që janë në qarkullim shumë lajme të rreme, të cilat synojnë përhapjen e frikës, ju lutemi të ndiqni faqen zyrtare të policisë së Kosovës rreth përditësimeve më të fundit zyrtare në këtë drejtim”, shkroi ai.