Anëtarët e Bashkimit Evropian(BE) duhet të arrijnë marrëveshje për çështjen e paketës së ardhshme të sanksioneve ndaj Rusisë, ka thënë të hënën shefi i diplomacisë së BE-së, Josep Borrell.
Në këtë paketë të sanksioneve ai ka përmendur si pikë kryesore vendosjen e kufizimeve për importin e naftës ruse.
“Ne duhet të vendosim unanimisht. Ka pasur bisedime të vështira dje pasdite, si dhe sot në mëngjes”, ka thënë Josep Borrell për “France Info”.
Ai, ndër të tjera, ka shtuar, “Unë mendoj se sot pasdite, ne do të jemi në gjendje t’u ofrojmë krerëve të vendeve anëtare një marrëveshje”, raporton Reuters.
Vendet e Bashkimit Evropian nuk arritën të kenë një marrëveshje për sanksionet ndaj naftës ruse të dielën, pasi ato kërkojnë të përgatisin një marrëveshje në kohë për një samit të BE-së të hënën pasdite.
I pyetur nëse planet për të përfshirë një ndalim të importit të naftës ruse mund të dështojnë për shkak të rezistencës nga Hungaria dhe shtetet e tjera të Evropës Lindore, Borrell është përgjigjur: “Jo, nuk mendoj kështu…do të ketë një marrëveshje në fund.”
Sipas Borell, duhet të merren parasysh rrethanat individuale të secilit anëtar të BE-së.
“Një zgjidhje gjithëpërfshirëse nga BE-ja duhet të bëhet në mënyrë që t’u japë tri vendeve që përbëjnë 7 për qind deri në 8 për qind të importeve të naftës ruse, më shumë kohë për t’u përshtatur”, ka thënë Borell.
Ndryshe, Presidentja e Komisionit Evropian, Ursula von der Leyen, të hënën e 9 majit, ka bërë një udhëtim në kryeqytetin e Hungarisë për negociata me kryeministrin hungarez, Viktor Orban, në përpjekje për të shpëtuar propozimin, por ende nuk është arritur një marrëveshje.
