Britanikët të cilët po niseshin për pushime me traget janë përballur me pritje për orë të tëra në portin e Doverit, të premten e 22 korrikut, ndërsa autoritetet kanë fajësuar Francën për kaosin e krijuar.
Autoritetet e Doverit kanë thënë se mungesa e zyrtarëve francezë të kufirit po çonte në pritje deri në gjashtë orë për kontrolle kufitare në portin e Manshit, me radhët e trafikut turistik dhe të mallrave që pengojnë rrugët për kilometra.
Që kur Britania është larguar nga Bashkimi Evropian në vitin 2021, udhëtarët në Mbretërinë e Bashkuar po përballen me kontrolle më të rrepta kufitare kur udhëtojnë në kontinent. Në Dover, ato kryhen në anën angleze të kanalit nga stafi francez, transmeton euronews.
Operatori i trageteve P&O ka thënë se “aktualisht ka radhë më shumë se katër orë për të arritur kontrollet kufitare” në Dover. Ai u ka bërë thirrje udhëtarëve që të “mbërrijnë të përgatitur për një pritje të zgjatur. Mbani me vete ushqime dhe ujë shtesë.”
Ndryshe, Britania e Madhe kohëve të fundit është përballur me valën e të nxehtit duke arritur rekord të temperaturave prej 40 gradë Clesius.